სტამბოლში აზერბაიჯანის მიერ „არასასურველ პირად“ გამოცხადებული ილდირიმი ერთი დღით დააკავეს

სტამბოლის პოლიციამ თურქი რელიგიური აქტივისტი მუჰამედ ემინ ილდირიმი სოციალურ ქსელში გამოქვეყნებული პოსტების გამო ერთი დღით დააკავა. მას აზერბაიჯანში შესვლა აკრძალული აქვს. ინციდენტი ბაქოსა და ანკარას შორის მზარდი დაძაბულობის ფონზე მოხდა.

ილდირიმი ისლამისტური მედიაპლატფორმის Köklü Değişim Medya-ს სტამბოლის წარმომადგენელია და იმ 31 თურქეთის მოქალაქეს შორისაა, რომლებიც აზერბაიჯანმა არასასურველ პირებად გამოაცხადა. პოლიციამ იგი იმავე ღამეს გაათავისუფლა. 26 ოქტომბერს Köklü Değişim Medya-მ დაკავების შესახებ განცხადება X-ზე გაავრცელა და აღნიშნა, რომ საქმეს ილდირიმის ადვოკატის მონაწილეობით აკვირდებოდნენ. პლატფორმის შემდგომი განცხადებით, ილდირიმი 27 ოქტომბერს გაათავისუფლეს.

გათავისუფლების შემდეგ ილდირიმმა მადლობა გადაუხადა აქტივისტებს, ჟურნალისტებსა და ორგანიზაციებს, რომლებმაც მისი დაკავების ფაქტს ყურადღება მიაქციეს. „ჰიჯაბი ალაჰის მცნებაა. ჩვენ არასოდეს მივატოვებთ ჩვენს აზერბაიჯანელ დებს, რომლებიც მას აფასებენ“, – განაცხადა მან. ილდირიმის თქმით, ის მუსლიმების დაცვასა და ჩაგრულთა გვერდით დგომას გააგრძელებს მათ წინააღმდეგ, ვისაც თავად მჩაგვრელებად მიიჩნევს. მან ასევე გააკრიტიკა ისინი, ვინც, მისი თქმით, პოლიტიკურ და კომერციულ ინტერესებს უსამართლობაზე რეაგირებაზე მაღლა აყენებს და უსამართლობის წინააღმდეგ ხმამაღლა მოლაპარაკეების გაჩუმებას ცდილობს.

დაკავებას თურქეთში რელიგიური ჯგუფების კრიტიკა მოჰყვა. ისლამისტური „ახალი კეთილდღეობის პარტიის“ ლიდერმა ფათიჰ ერბაქანმა X-ზე ერდოღანი გააკრიტიკა და ალიევის მიმართ მის რეაგირებასთან დაკავშირებით კითხვები დასვა. „ეს ნიშნავს თუ არა, რომ ჩვენი პრეზიდენტი, რომელიც ამბობს, „მსოფლიო ხუთზე მეტია“ და რომელსაც მსოფლიო ლიდერად მიიჩნევენ, ილჰამ ალიევს ქედს უხრის?“ – დაწერა მან. ერბაქანმა ერდოღანის ცნობილ გამონათქვამზე მიუთითა, რომლითაც თურქეთის პრეზიდენტი გაეროს უშიშროების საბჭოს ხუთ მუდმივ წევრს აკრიტიკებს. მისი არსია, რომ მსოფლიოს ბედი მხოლოდ ხუთმა სახელმწიფომ არ უნდა გადაწყვიტოს.

„თუმცა, როგორც კი ალიევი რეკავს, ყველაფერი ჩერდება. მნიშვნელობა არ აქვს, რას ეხება საქმე: თავსაფარს, ადამიანის უფლებებს თუ რწმენის თავისუფლებას. შექმნილი სურათი ისეთია, თითქოს ალიევი ბრძანებას გასცემს, ჩვენ კი მაშინვე ვემორჩილებით. გაქვთ უფლება, ერი ამგვარ სირცხვილს აზიაროთ?“ – დასძინა ერბაქანმა.

დაძაბულობის მიზეზებია აზერბაიჯანის სკოლებში ჰიჯაბის ტარების შეზღუდვები და ანკარაში მომუშავე რელიგიური პირების მიერ აზერბაიჯანის მთავრობის კრიტიკა. ამ შეზღუდვების გამო Köklü Değişim-ის წევრებმა სტამბოლში აზერბაიჯანის გენერალური საკონსულოს წინ საპროტესტო აქცია გამართეს. თურქეთის მოქალაქეებმა და რელიგიურმა ჯგუფებმა ასევე გააკრიტიკეს ერდოღანის მრჩევლის თანამდებობიდან ოქტაი სარალის გათავისუფლება, რომელიც ილდირიმის დაკავებამდე მოხდა. სოციალურ ქსელებში ბევრმა მომხმარებელმა ეს მოვლენები ერდოღანის პოლიტიკურ მარცხადაც შეაფასა.

აზერბაიჯანმა ცალკე გადაწყვეტილებით თურქეთის შვიდი მოქალაქე საერთაშორისო ძებნილთა სიებშიც შეიყვანა. 27 ოქტომბრის დილიდან სოციალურ ქსელებში ვრცელდება ცნობები, რომ თურქეთში Köklü Değişim-ის წევრები დააკავეს ან პოლიციის განყოფილებებში დაკითხვაზე დაიბარეს. ეს ინფორმაცია ოფიციალურად არ დადასტურებულა.