ჯაფარიძე საკონსტიტუციოში: „ოცნება“ პარტიების აკრძალვით კონსტიტუციური გადატრიალებისთვის ამზადებს ნიადაგს

„ლელო-ძლიერი საქართველოს“ ლიდერმა ბადრი ჯაფარიძემ საკონსტიტუციო სასამართლოში, სადაც პარტიების აკრძალვაზე „ქართული ოცნების“ სარჩელს განიხილავენ, განაცხადა, რომ მმართველი პარტია სარჩელით საქართველოს დამოუკიდებელი სახელმწიფოებრიობის აკრძალვას ცდილობს და არა რამდენიმე პოლიტიკური პარტიისა. მისი თქმით, ოპოზიციური პარტიების აკრძალვით მმართველი ძალა ამომრჩეველს პოლიტიკურ არჩევანს წაართმევს და კონსტიტუციის დონეზე განამტკიცებს „დე ფაქტო უზურპირებულ ხელისუფლებას“.

ჯაფარიძემ თქვა, რომ გააჩნიათ საფუძველი ვივარაუდონ, რომ პარტიების აკრძალვით „ქართული ოცნება“ კონსტიტუციური გადატრიალებისთვის ამზადებს ნიადაგს. მისი განმარტებით, მმართველ ძალას სურს, არჩევნებს მათივე დათვლებით მილიონზე მეტი სხვაგვარად მოაზროვნე ამომრჩეველი ჩამოაშოროს, საკონსტიტუციო უმრავლესობა მოიპოვოს და ხელისუფლება კონსტიტუციის დონეზე განამტკიცოს. ჯაფარიძის თქმით, „ოცნება“ ქვეყანას რუსულ-ავტოკრატიული სტილით მართვას და საქართველოს თავისუფალი სამყაროსგან იზოლაციას ისახავს მიზნად. მან დასძინა, რომ მათი აქ ყოფნის მიზანია საქართველოს დამოუკიდებლობისა და თავისუფლების დაცვა ხელისუფლებისგან, რომელიც კონსტიტუციის ჩარჩოებიდან გავიდა.

„ლელოს“ აკრძალვის მოთხოვნაზე ჯაფარიძემ თქვა, რომ პარტია 2019 წლის დეკემბრიდან ისახავდა სახელმწიფო ინსტიტუტების გაძლიერებას, სასამართლოს დამოუკიდებლობასა და ევროპული ინტეგრაციის გზაზე სწრაფ სვლას. მისი თქმით, ამის პასუხად პარტია მეშვიდე წელია „ოცნების“ მიერ ინსპირირებული პოლიტიკურად მოტივირებული სისხლისსამართლებრივი დევნის ქვეშაა. ჯაფარიძემ გაიხსენა 2020 წლის არჩევნების შემდეგ გამოცხადებული საპარლამენტო ბოიკოტი, რომელიც 2021 წელს შარლ მიშელის შუამავლობით მიღწეული შეთანხმების საფუძველზე შეწყვიტეს. მისი განცხადებით, „ქართულმა ოცნებამ“ შეთანხმებიდან გასვლით ვალდებულებები შეუსრულებელი დატოვა.

ჯაფარიძის თქმით, მმართველი პარტია დანაშაულად მიიჩნევს სალომე ზურაბიშვილის მიერ შეთავაზებულ „ქართულ ქარტიაზე“ ხელმოწერას და მას იმის მტკიცებულებად წარმოაჩენს, რომ ხუთი პარტია ერთ ორგანიზმს წარმოადგენს. მან განაცხადა, რომ ქარტიაზე ხელმოწერა ლეგიტიმური ქმედება იყო და კონსტიტუციის 78-ე მუხლის შესრულებას ემსახურება. გერმანიის მაგალითი მოიყვანა, სადაც კოალიციურ მთავრობაში ქრისტიანულ-დემოკრატიული და სოციალ-დემოკრატიული პარტიები არიან, და თქვა, რომ პოზიციების თანხვედრა პარტიებს ერთ ორგანიზმად არ აქცევს.

პარლამენტში არშესვლის ბრალდებაზე ჯაფარიძემ თქვა, რომ მისი მანდატი 2022 წელს თავად „ქართულმა ოცნებამ“ შეუწყვიტა მოსამართლე არევაძის გადაწყვეტილების საფუძველზე, რომელიც სააპელაციო სასამართლოს კოლეგიამ ჯორბენაძის თავმჯდომარეობით ძალაში დატოვა. მისი თქმით, გადაწყვეტილება სტრასბურგის სასამართლოშია გასაჩივრებული, რომელმაც საქმე მოკლე ვადებში მიიღო წარმოებაში და გადაწყვეტილებას ელოდებიან. ჯაფარიძემ გაიხსენა, რომ 1990 წელს არჩევნებით დაამარცხეს კომუნისტური პარტია, 1991 წელს მან დამოუკიდებლობის დეკლარაციას მოაწერა ხელი, შემდეგ კი იარაღის ძალით შეუწყვიტეს პარლამენტის მანდატი.

მან კონსტიტუციის 42-ე მუხლზე დაყრდნობით თქვა, რომ საგამოძიებო კომისიის შემადგენლობაში მინიმუმ 50% ოპოზიციის წარმომადგენელი უნდა იყოს, „ქართულმა ოცნებამ“ კი კომისია ამ მოთხოვნის უგულებელყოფით შექმნა. ჯაფარიძემ ისიც თქვა, რომ სარჩელის ერთ-ერთი მტკიცებულება — 2004-2012 წლებში ბიზნესზე უკანონო თავდასხმის ხელშეწყობა, რაც საპარლამენტო საგამოძიებო კომისიის დასკვნით დასტურდება — არის უდანაშაულობის პრეზუმფციის დარღვევა და პირდაპირი ცილისწამება, რადგან სასამართლო დასკვნა არ არსებობს. მისი განმარტებით, საგამოძიებო კომისიის დასკვნაში ჩამოთვლილი სამი-ოთხი პირიდან მხოლოდ ახვლედიანმა მიმართა სასამართლოს და არცერთმა ინსტანციამ მისი სარჩელი არ დააკმაყოფილა.

ჯაფარიძის თქმით, თუ საარჩევნო სიაში შემავალი პირის დანაშაული პარტიის გაუქმების საფუძველია, ამ ლოგიკით „ქართული ოცნებაც“ უნდა გაუქმდეს, რადგან მისი წევრები მაღალ თანამდებობებზე კორუფციულ დანაშაულს სჩადიოდნენ. მან სარჩელის კიდევ ერთ სახიფათო ასპექტად სუვერენიტეტი და ტერიტორიული მთლიანობა დაასახელა და თქვა, რომ სარჩელში ვითარდება ლოგიკა, თითქოს 2008 წელს რუსეთის აგრესიისთვის ნიადაგი თავად საქართველომ შექმნა. მისი შეფასებით, ეს პასუხისმგებლობის აგრესორიდან მსხვერპლზე გადატანის მცდელობაა, სარჩელის დაკმაყოფილება კი შეიძლება რუსეთის „არგაღიზიანების პოლიტიკას“ კონსტიტუციურ ვალდებულებად აქცევდეს. ჯაფარიძემ საკონსტიტუციო სასამართლოს მოუწოდა, სრულად გაითავისოს პასუხისმგებლობა, რომ ოკუპირებული ტერიტორიების არაღიარების პრინციპს საფრთხე არ შეექმნას.