ინდოეთის საგარეო საქმეთა მინისტრი ბაქოში ალიევს და ბაირამოვს შეხვდა

ინდოეთის საგარეო საქმეთა მინისტრი სუბრაჰმანიამ ჯაიშანკარი 23 ოქტომბერს აზერბაიჯანს ეწვია. მან პრეზიდენტ ილჰამ ალიევთან და აზერბაიჯანელ კოლეგასთან, ჯეიჰუნ ბაირამოვთან პირისპირ შეხვედრები გამართა. ეს ჯაიშანკარის პირველი ვიზიტია აზერბაიჯანში, ასევე ინდოეთის ყველაზე მაღალი დონის დელეგაციის ვიზიტი ბოლო თითქმის ათი წლის განმავლობაში.

ბაქოსა და ნიუ-დელის ურთიერთობებს ისტორიულად ართულებდა ინდოეთის მჭიდრო კავშირები სომხეთთან, აზერბაიჯანი კი დიდი ხანია ინდოეთის მთავარი გეოპოლიტიკური მოწინააღმდეგის, პაკისტანის მოკავშირეა. პაკისტანმა სომხეთთან დიპლომატიური ურთიერთობები მხოლოდ 2025 წელს დაამყარა.

გავრცელებული ინფორმაციით, 2025 წლის სექტემბერში ინდოეთმა დაბლოკა აზერბაიჯანის გაწევრიანება შანხაის თანამშრომლობის ორგანიზაციაში (SCO), პაკისტანმა კი ორგანიზაციაში სომხეთის გაწევრიანებას შეუშალა ხელი. 2025 წლის მაისში ინდოეთ-პაკისტანის კონფლიქტის დროს ერთ მხარეს ინდოეთი და სომხეთი აღმოჩნდნენ, მეორე მხარეს კი პაკისტანი და აზერბაიჯანი. ამ დაპირისპირებამ ინდოეთსა და აზერბაიჯანს შორის დაძაბულობა გამოიწვია.

პრესკონფერენციაზე ჯაიშანკარმა განაცხადა, რომ პრემიერ-მინისტრი ნარენდრა მოდი და ილჰამ ალიევი ბიშკეკში, შანხაის თანამშრომლობის ორგანიზაციის სამიტის ფარგლებში შეხვდნენ ერთმანეთს, ბაქოში ვიზიტი კი ამ შეხვედრის გაგრძელება იყო. „ჩვენი ურთიერთობების სხვადასხვა ასპექტზე მოსაზრებები გავცვალეთ“, – განაცხადა მან.

ჯაიშანკარის თქმით, ბაირამოვთან ურთიერთობების გაფართოებაზე ისაუბრა და ეკონომიკური თანამშრომლობის საკითხები განიხილა, მათ შორის ვაჭრობა, ინვესტიციები და ენერგეტიკა. მან აღნიშნა, რომ ინდური კომპანიები აზერბაიჯანში მრავალი წელია საქმიანობენ და ინვესტიციებს, განსაკუთრებით ნავთობისა და ენერგეტიკის სექტორში, გადამწყვეტი მნიშვნელობა აქვს.

„ორივე ქვეყანას მნიშვნელოვანი წვლილი შეაქვს საერთაშორისო ჩრდილოეთ-სამხრეთის სატრანსპორტო დერეფნის განვითარებაში. შევთანხმდით, რომ ამ მიმართულებით უფრო მჭიდროდ ვითანამშრომლებთ. ასევე განვიხილეთ პირდაპირი ავიარეისების რაოდენობის გაზრდისა და ჩვენი ურთიერთობების შემდგომი გაღრმავების გზები“, – თქვა ჯაიშანკარმა. მან ხაზი გაუსვა აზერბაიჯანსა და სომხეთს შორის მშვიდობის მიღწევის პროცესში არსებული პროგრესის მნიშვნელობასაც.

შეხვედრის შემდეგ გავრცელებულ ოფიციალურ განცხადებაში ალიევმა აღნიშნა, რომ პრემიერ-მინისტრ მოდის დავალებით ჯაიშანკარის ვიზიტს მაღალ შეფასებას აძლევს და ხაზი გაუსვა ინდოეთთან ორმხრივი ურთიერთობების განხილვის მნიშვნელობას. აზერბაიჯანულ განცხადებაში ხაზგასმულია, რომ აზერბაიჯანი და ინდოეთი „გლობალური სამხრეთის წევრები არიან“ და „საერთაშორისო დღის წესრიგის რიგ საკითხებზე, მათ შორის გლობალური სამხრეთის ქვეყნების ინტერესებთან დაკავშირებულ თემებზე, მსგავს პოზიციებს იზიარებენ“. მხარეებმა პოლიტიკური, სავაჭრო-ეკონომიკური, მაღალტექნოლოგიური, კულტურული, ჰუმანიტარული და სხვა მიმართულებებით თანამშრომლობის პერსპექტივები განიხილეს.

აზერბაიჯანის მთავრობის მხარდამჭერი კვლევითი ცენტრის, AIR Centre-ის ხელმძღვანელმა ვასიფ ჰუსეინოვმა დაწერა, რომ ინდოეთ-აზერბაიჯანის ურთიერთობებს დიდი პოტენციალი აქვს და ახლა არსებობს პოლიტიკური ნება მის რეალიზებისთვის. ინდური მედია The Hindu-ს დიპლომატიური საკითხების რედაქტორმა სუჰასინი ჰაიდარმა შეხვედრა ურთიერთობებში „მნიშვნელოვან გარდატეხად“ შეაფასა და თქვა: „როცა საჭიროა, დიპლომატია მუშაობს“. მისი თქმით, ეს განსაკუთრებით საყურადღებოა იმის გათვალისწინებით, რომ ერთი წლით ადრე მხარეები შანხაის თანამშრომლობის ორგანიზაციაში ერთმანეთის გაწევრიანებას საპასუხო ნაბიჯებით ბლოკავდნენ.