საფრანგეთში სკოლებისა და ფასების გამო გამართულ აქციებზე 1200-მდე ადამიანი დააკავეს

საფრანგეთის მასშტაბით სკოლებში არსებული პრობლემებისა და გაძვირებული ფასების წინააღმდეგ გამართულ დემონსტრაციებზე ძალადობა დაიწყო. მედიის ცნობით, დააკავეს სულ მცირე 1200 ადამიანი. მთავრობამ მომხდარს „ძალადობის ესკალაცია“ უწოდა. BBC-ის მონაცემით, ქუჩებში დაახლოებით 550 000 ადამიანი გამოვიდა.

პარიზში საღამოს საათებში მნიშვნელოვანი შეტაკებები მოხდა სპეცრაზმთან, რომელმაც შეკრებილთა წინააღმდეგ ცრემლსადენი გაზი და წყლის ჭავლი გამოიყენა. დღის მეორე ნახევარში მთავარი მსვლელობა ძირითადად მშვიდობიანი ჩანდა. ახალგაზრდების ჯგუფმა BBC-ს განუცხადა, რომ ისინი „პაციფისტები“ არიან, რომლებიც „უბრალოდ ცდილობენ, რომ რამე შეცვალონ, მაგრამ არაფერი იცვლება“. დღის განმავლობაში ზოგიერთმა ჯგუფმა ქუჩებში ცეცხლი დაანთო და მანქანები გადაწვა, მათ შორის რესპუბლიკის მოედანზე. დაარბიეს მაღაზიები, სულ მცირე ერთი რესტორანი ხანძარმა გაანადგურა, BBC-მ კი ზოგიერთ ჯგუფს შორის ჩხუბიც დააფიქსირა. ასევე დაფიქსირდა სპეცრაზმის მიერ პარიზის ცენტრში შეკრებილებზე იერიშის მიტანისა და რამდენიმე ადამიანისთვის ხელკეტის დარტყმის ფაქტები.

დედაქალაქსა და სხვა რეგიონებში შენობებს ცეცხლი წაუკიდეს. ლიმოჟში მერიის შენობაში გაჩენილმა ძლიერმა ხანძარმა, ადგილობრივი პრეფექტურის განცხადებით, სახურავის ნაწილობრივი ჩამონგრევა გამოიწვია. ლიონში ქალაქის ტურისტული ოფისი დაიწვა. მერმა გრეგორი დუსემ ეს ქალაქისთვის „ტრაგედიად“ შეაფასა და BFMTV-ს განუცხადა: „გული გვწყდება, რადგან ეს ძალიან საკულტო, ცნობილი ისტორიული შენობაა“. ადგილობრივი პოლიციის თქმით, „მტრულად განწყობილმა პირებმა“ მეხანძრეებს ხანძრის უსაფრთხოდ ჩაქრობის საშუალება არ მისცეს.

სენტ-ეტიენში ახალგაზრდა მამაკაცს „ყუმბარამ ხელი მოჰგლიჯა“, განაცხადა ქალაქის მერმა რეჟის ჟუანიკომ სოციალურ ქსელში და დასძინა: „ასეთი ტრაგედია არასდროს უნდა მომხდარიყო.“

რამდენიმე ქალაქში ძარცვა დაიწყო, ვრცელდება ინფორმაცია მერიებისა და ბიზნესობიექტების მიმართ მასშტაბური ვანდალიზმის შესახებაც. პარიზში ტანსაცმლისა და სურსათის მაღაზიები დაარბიეს, ლილში კი Apple-ის მაღაზიაში შეიჭრნენ და გაძარცვეს. შენობების დაზიანების შესახებ ინფორმაცია გრენობლიდან, ავინიონიდან, პოდან, მონპელიედან და ვალანსიდანაც გავრცელდა. BBC Verify-ის მიერ დამოწმებულ კადრებში ჩანს, რომ გრენობლში, ქალაქის ცენტრში, ვიწრო ქუჩაზე ნიღბიან პირებს ტურისტული მატარებელი სულ მცირე სამი სპეცრაზმელის მიმართულებით მიჰყავთ.

შინაგან საქმეთა სამინისტროს განცხადებით, აქციებზე ზოგიერთ ადგილას „კაპიუშონიანი პირები“ „მიზანმიმართულ ძალადობრივ ქმედებებს“ ეწეოდნენ. ეს ეხება დედაქალაქის ნაწილებს, მარსელს, რენს, ტულუზასა და ანჟეს. პრემიერ-მინისტრმა სებასტიენ ლეკორნიუმ თქვა, რომ არეულობის დროს 150 პოლიციელი დაშავდა. მისი თქმით, პოლიცია „უკიდურესი ინტენსივობის ძალადობის“ წინაშე აღმოჩნდა, ზოგიერთი ჯგუფი კი საპროტესტო აქციებს საპრეზიდენტო არჩევნების წინ „გასახურებლად“ იყენებდა. ლეკორნიუმმა დასძინა: „ვერავინ მოახვევს სხვას თავს საკუთარ პოლიტიკურ დღის წესრიგს ძალადობის გზით.“

ბოლო კვირების განმავლობაში ასობით ათასი მოსწავლე აპროტესტებდა კადრების დეფიციტსა და მოძველებულ ინფრასტრუქტურას ლიცეუმებში, ანუ საშუალო სკოლებში, სადაც 15-დან 18 წლამდე მოზარდები სწავლობენ. შაბათს მათ პროფკავშირების წევრები და სხვა საპროტესტო ჯგუფები შეუერთდნენ. მათ შორისაა „ყვითელი ჟილეტების“ მოძრაობაც, რომელიც 2018 წლიდან ერთ წელზე მეტ ხანს აპროტესტებდა ცხოვრების გაძვირებას.

განათლების მინისტრმა ედუარდ ჟეფრემ 8 ოქტომბერს სატელევიზიო ინტერვიუში 3000 დამატებითი მასწავლებლის დანიშვნის პირობა დადო, თუმცა აქციები გაგრძელდა და უფრო გააქტიურდა. BBC-ის ცნობით, ტალღა ქვეყნის ღრმა პოლიტიკური გაურკვევლობის პერიოდში ხდება. პრეზიდენტი ემანუელ მაკრონი თანამდებობას მომავალ წელს დატოვებს, გამოკითხვებით კი აპრილის საპრეზიდენტო არჩევნებზე შესაძლოა „ეროვნული გაერთიანების“ ლიდერ მარინ ლე პენსა და „დაუმორჩილებელი საფრანგეთის“ წარმომადგენელ ჟან-ლუკ მელანშონს შორის ბრძოლა გაიმართოს.

მელანშონი დემონსტრაციებში მონაწილეობდა, მოგვიანებით კი პოლიციელები მომიტინგეებზე „თავდასხმაში“ დაადანაშაულა და ამავდროულად ძარცვა და ხანძრები დაგმო. ლეკორნიუმმა მისი კომენტარები „საშიშად და ცინიკურად“ შეაფასა. ლე პენმა განაცხადა, რომ მომიტინგეების „ლეგიტიმური მოთხოვნები ულტრამემარცხენეებმა მძევლად აიყვანეს“ და მელანშონი ძალადობის გაღვივებაში დაადანაშაულა. მაკრონმა განაცხადა: „ისინი, ვინც ამტვრევდნენ, თავს ესხმოდნენ პრეფექტურებსა და ბიზნესებს, ძარცვავდნენ ჩვენს მერიებსაც კი, პასუხისგებაში მიეცემიან და დაისჯებიან.“