პენიტენციურ დაწესებულებებში 12 375 პატიმარია, სამ დაწესებულებაში ლიმიტი გადაჭარბებულია

საქართველოს სტატისტიკის ეროვნული სამსახურის მონაცემებით, 2026 წლის 30 სექტემბრის მდგომარეობით, პენიტენციურ დაწესებულებებში სულ 12 375 პირი იყო, მათ შორის 11 735 კაცი და 640 ქალი. სპეციალური პენიტენციური სამსახურის თანახმად, ბრალდებულებისა და მსჯავრდადებულების საერთო რაოდენობა ქვეყნის მოსახლეობის 0.31%-ია.

2026 წლის პირველი იანვრის მდგომარეობით, ქვეყნის მოსახლეობა 3 941 103 იყო: 1 887 646 კაცი და 2 053 457 ქალი. ამის მიხედვით, პატიმარი კაცები მამრობითი სქესის მოსახლეობის 0.62%-ს შეადგენს, ქალები კი მდედრობითი სქესის მოსახლეობის 0.03%-ს.

12 375 პირიდან 2 765 ბრალდებულია (22.3%), 9 610 კი მსჯავრდადებული (77.7%). ბრალდებულები რვა დაწესებულებაში იყვნენ განთავსებული, ყველაზე მეტი — №8 დაწესებულებაში. მსჯავრდადებულები 14 დაწესებულებაში იყვნენ, ყველაზე მეტი — №15 დაწესებულებაში.

ყველაზე დიდი ჯგუფი სრულწლოვანი კაცებია — 11 558 პირი. ასაკობრივი ჯგუფებიდან ყველაზე მაღალი წილი 41-49 წლის ბრალდებულებსა და მსჯავრდადებულებზე მოდის.

სისტემაში 191 არასრულწლოვანია, ანუ პატიმართა საერთო რაოდენობის 1.5%. მათგან 72 ბრალდებულია (ოთხი გოგო), ხოლო 119 — მსჯავრდადებული (10 გოგო). არასრულწლოვანი ბრალდებულები ბრალდებულთა საერთო რაოდენობის 2.6%-ია, არასრულწლოვან ბრალდებულთა და მსჯავრდადებულთა საერთო რაოდენობის კი 37.7%. არასრულწლოვანი მსჯავრდადებულები მსჯავრდადებულთა 1.2%-ია და არასრულწლოვანთა საერთო რაოდენობის 62.3%.

14 დაწესებულებაში საპატიმრო ადგილების საერთო ლიმიტი 12 548-ია, ანუ პატიმართა რაოდენობა ლიმიტზე 173-ით (1.4%) ნაკლებია. მიუხედავად ამისა, სამ დაწესებულებაში პატიმრების რაოდენობა დასაშვებ ზღვარს აჭარბებს, დანარჩენ 11-ში კი თავისუფალი ადგილებია.

ლიმიტი გადაჭარბებულია ქსნის №15, გლდანის №8 და ქუთაისის №2 დაწესებულებებში. ქსნის №15-ში ლიმიტზე 555-ით მეტი პირია (34.6%), გლდანის №8-ში — 742-ით მეტი (30.59%), ქუთაისის №2-ში კი — 292-ით მეტი (27.34%).

9 610 მსჯავრდადებულიდან ყველაზე მეტი განსაკუთრებით მძიმე დანაშაულისთვის არის მსჯავრდადებული — 4 421 პირი. მძიმე დანაშაულისთვის მსჯავრდადებულია 3 939 პირი.

დანაშაულის სახეობის მიხედვით, 4 530 პირი (32.94%) საზოგადოებრივი უშიშროებისა და წესრიგის წინააღმდეგ ჩადენილი დანაშაულისთვის იხდის სასჯელს. ადამიანის წინააღმდეგ ჩადენილი დანაშაულისთვის მსჯავრდადებულია 4 245 პირი (30.87%), ეკონომიკური დანაშაულისთვის კი — 3 873 (28.16%).

9 610 მსჯავრდადებულიდან 9 419-ს დაწესებულების ტიპი განსაზღვრული ჰქონდა, 191 მსჯავრდადებული კი შესაბამის გადაწყვეტილებას ელოდებოდა.