აშშ-ის კონგრესმენები პენტაგონს უკრაინისთვის Starshield-ის კონტრაქტის გაგრძელებას სთხოვენ

აშშ-ის კონგრესის წევრები პენტაგონს მოუწოდებენ, უკრაინისთვის Starshield-ის კონტრაქტი გააფართოვოს. ეს ერთობლივ განცხადებაშია ნათქვამი.

კონგრესმენები აშშ-ის თავდაცვის მდივან პიტ ჰეგსეთსა და პენტაგონს მიმართავენ. მათი თხოვნით, Starshield-ის პროგრამის კონტრაქტი უნდა გაგრძელდეს, უკრაინას კი Starlink-ისა და Starshield-ის თანამგზავრულ კავშირზე წვდომა უნდა აღუდგეს.

კონგრესის ორივე პარტიისა და პალატის წევრები უკრაინისთვის Starshield-ზე წვდომის აღდგენას სიჩქარის შეზღუდვის გარეშე ითხოვენ.

„უკრაინული ძალები ამ სერვისებს მართვისა და სარდლობისთვის, სადაზვერვო მონაცემების გაზიარებისთვის, ბრძოლის ველზე კავშირისა და დრონების ექსპლუატაციისთვის იყენებენ. ამ სერვისების ხარისხის ნებისმიერი სახის გაუარესება - იქნება ეს სიჩქარის შემცირება, დაფარვის ზონის შეზღუდვა თუ წვდომის შეფერხება - უკრაინის ბრძოლის უნარიანობას ძირს უთხრის და რუსულ ჯარებს ოპერატიულ უპირატესობას ანიჭებს. ეს კონფლიქტს აჭიანურებს და კიდევ უფრო მეტ მშვიდობიან მოქალაქეს საფრთხის ქვეშ აყენებს“, - ნათქვამია კონგრესმენების მიმართვაში.

უკრაინის პრეზიდენტმა ვოლოდიმირ ზელენსკიმ პარასკევს საღამოს განაცხადა, რომ უკრაინის ტერიტორიაზე Starlink-ის თანამგზავრული კავშირის ტერმინალებისთვის სიჩქარის შეზღუდვა კვლავ ძალაშია.

„Starlink-ისა და Starshield-ისთვის სიჩქარის შეზღუდვა ძალაში რჩება, სიჩქარე არ აღდგენილა“, - აღნიშნა ზელენსკიმ.