კალუგის ოლქში „იანდექსის“ მონაცემთა ცენტრს დრონებით დაესხნენ თავს

რუსეთის კალუგის ოლქში კომპანია „იანდექსის“ მონაცემთა ცენტრს უპილოტო საფრენი აპარატებით თავს დაესხნენ. ბოლო ორ დღეში ეს ასეთი მეორე თავდასხმაა.

კომპანიის პრესსამსახურმა BBC-ს განუცხადა, რომ ცენტრის ინფრასტრუქტურის ნაწილი დაზიანდა, დაშავებული არავინაა.

„მონაცემთა ცენტრის რამდენიმე მოდული სრულად გამოვიდა მწყობრიდან. ამის გამო „იანდექსის“ სერვისების ნაწილმა შესაძლოა შეფერხებებით იმუშაოს. ზარალის სრული მასშტაბი ამჟამად ფასდება“, – განაცხადეს „იანდექსში“.

კალუგის ოლქის გუბერნატორის, ვლადისლავ შაპშას თქმით, ქალაქ კალუგისა და რეგიონის კიდევ სამი მუნიციპალიტეტის თავზე 26 დრონი ჩამოაგდეს. მისივე ინფორმაციით, დაშავდა 9 ადამიანი.

უკრაინას ამ ფაქტთან დაკავშირებით ჯერ კომენტარი არ გაუკეთებია.

8 ოქტომბერს „იანდექსის“ მონაცემთა ცენტრს თავს დაესხნენ რიაზანის ოლქშიც. კომპანიამ მაშინ განაცხადა, რომ ცენტრის მუშაობა შეჩერდა, მსხვერპლი არ ყოფილა.