ბაჩალიაშვილის მშობლები რუსთავის ციხესთან ლილუაშვილსა და ღარიბაშვილს მიმართავენ

გარდაცვლილი პროგრამისტის, თამარ ბაჩალიაშვილის მშობლებმა რუსთავის მე-12 პენიტენციურ დაწესებულებასთან აქცია გამართეს. ბანერებზე ეწერა: „გრიგოლ ლილუაშვილო, ილაპარაკე!“ და „ირაკლი ღარიბაშვილო, ილაპარაკე!“.

მათი მიმართვის ადრესატები მსჯავრდებული ყოფილი მაღალჩინოსნები, ირაკლი ღარიბაშვილი და გრიგოლ ლილუაშვილი იყვნენ. გარდაცვლილის მშობლების განცხადებით, სუს-ის ყოფილ უფროსს, გრიგოლ ლილუაშვილსა და თავდაცვის ყოფილ მინისტრს, ირაკლი ღარიბაშვილს, თამარ ბაჩალიაშვილის გარდაცვალებასთან დაკავშირებით ინფორმაცია აქვთ და მათ ამ ინფორმაციის გასაჯაროებისკენ მოუწოდებენ.

თეონა თამაზაშვილის თქმით: „რამდენიმე კვირის წინ, ჩვენ ლილუაშვილთან და ღარიბაშვილთან გავაგზავნეთ წერილები, სადაც მოვთხოვეთ აღიარონ, თამარ ბაჩიაშვილის მკვლელობაში მონაწილეობა და დაასახელონ ის პიროვნებები, რომლებიც მათთან ერთად მოქმედებდნენ, რადგან თამარ ბაჩიაშვილის სისხლით ხელები ძალიან ბევრ ადამიანს აქვს დასვრილი. ჩვენ არ ვიცით, ადრესატამდე მივიდა თუ არა ჩვენი გზავნილი წერილი, ამიტომ მოვედით ციხესთან, რომ უშუალოდ მივმართოთ ღარიბაშვილს და ლილუაშვილს, რომ აღიარონ დანაშაული, თქვან ყველა გარემოება, რაც ამ საქმის ირგვლივ იციან და ერთგვარად გადაირჩინონ სული. კიდევ ერთხელ მივმართავ მათ, თქვენზე ძალიან ბევრი რამეა დამოკიდებული, საბოლოოდ თქვენ რომ არ დაგბრალდეთ მხოლოდ თამარ ბაჩალიაშვილის მკვლელობა, ჯობს აღიაროთ და დაასახელოთ დამკვეთები, შემსრულებლები“.

თამარ ბაჩალიაშვილის მამის, ჯუმბერ ბაჩალიაშვილის განმარტებით, მისი შვილის გარდაცვალებასთან დაკავშირებით გრიგოლ ლილუაშვილმა „ყველაფერი იცის“.

ჯუმბერ ბაჩალიაშვილმა განაცხადა: „ერთი თვე გავიდა წერილის შეგზავნიდან, დღემდე პასუხი არ არის. ლილუაშვილი, რატომ არის გაჩუმებული? მას ჰგონია, ეს ასე ჩაივლის, გამორიცხულია! ლილუაშვილმა დეტალურად იცის ყველაფერი, ვისი დავალებით მოკლეს ბავშვი, ვინ შეასრულა ეს საქმე, ყველაფერი იცის. ხომ ნახა ლილუაშვილმა, რომ არ დაუფასეს ამდენი ხალხის წამება, ერის და ქვეყნის ღალატი. ახლა მაინც გამოიჩინოს ოდნავ კაცობა, გვიპასუხოს, თქვას სიმართლე, ჩემი შვილის სისხლს მათ არ შევარჩენ“.