მაჭავარიანი: თბილისში მოსახლეობა წელიწადში მინიმუმ ათ დღეს საცობში ატარებს

მოძრაობა „სართული - ახალი თაობის ძალის“ ლიდერმა ვადო მაჭავარიანმა „პალიტრანიუსის“ გადაცემა „რეზიუმეში“ თბილისში სატრანსპორტო პოლიტიკასა და მშენებლობებზე ისაუბრა. მისი თქმით, ინვესტორებისა და „ქართული ოცნების“ სურვილია, რომ დედაქალაქში არცერთი კუთხე არ დარჩეს აუთვისებელი და ყველგან ბეტონი და კორპუსი იყოს. შედეგად, მისივე განმარტებით, თბილისელები წელიწადში მინიმუმ ათ დღეს საცობში ატარებენ.

მაჭავარიანმა თქვა, რომ ეს დრო 240-დან 300 საათამდეა და აღნიშნა, რომ კვლევა „სართულმა“ ჩაატარა. მისი განცხადებით, წერეთლის გამზირზე განსაკუთრებით რთული ვითარებაა და რეაბილიტაციის შემდეგ საცობები გაიზარდა. მაჭავარიანის თქმით, წერეთლის მეტროსთან გამოფენის დაკავშირების გეგმა კომუნისტების დროინდელია და იმ პერიოდში სამუშაოებიც დაწყებული იყო, თუმცა ახლა ამაში ინვესტიციის ჩადება არავის სურს.

მისი თქმით, ინვესტიციებს მხოლოდ მოლისა და კორპუსების მშენებლობაში დებენ. მაჭავარიანმა თქვა, რომ ვერ ხვდება, ვინ ყიდულობს ამ ბინებს და ივარაუდა, რომ ისინი, სავარაუდოდ, რუსებზე, არაბებზე და ირანელებზე აქვთ გათვლილი. ქართველებზე კი, მისი თქმით, ეს აღარ არის გათვლილი, რადგან ქვეყანაში ამის საშუალება აღარ არის. მან დაამატა, რომ დეპუტატის ხელფასი 15 ათასი ლარია, ვეტერანის დახმარება 100 ლარი, პენსია კი 45 ლარით იზრდება.

მაჭავარიანის შეფასებით, „ქართული ოცნების“ წარმომადგენლები იმდენად არიან საზოგადოებას მოწყვეტილი, რომ ხალხს სტატისტიკად აღიქვამენ. მისი თქმით, არ სურს ისეთი ბიზნესი და ინვესტიცია, რომელიც ქართველის ჩანაცვლებას, სიმწვანის გაქრობასა და სატრანსპორტო კოლაფსის გაძლიერებას უწყობს ხელს.

პოლიტიკოსის თქმით, სატრანსპორტო პრობლემის მოგვარება შესაძლებელია მეტროსადგურების დამატებით და მტკვარზე ოთხი ახალი ხიდის აშენებით: გმირთა მოედანზე, ბელიაშვილზე, „ვეფხი და მოყმესთან“ და ორთაჭალისკენ. მაჭავარიანმა აღნიშნა, რომ ყველაფერს თანხა სჭირდება და სკოლების აშენებაც ვერ ხერხდება, ერთი სკოლის მშენებლობა კი 20 მილიონი ლარი ჯდება. მისი თქმით, სადმე მაინც რომ დაინერგოს უფასო კვება პილოტის სახით, კარგი იქნებოდა.

მაჭავარიანის განცხადებით, ყველაფერი დათვლადია და მიზნის მიღწევა შესაძლებელია, თუ „ქართული ოცნება“ ხელფასებს განახევრებს და უახლესი მანქანების გამოყენებაზე უარს იტყვის. მისი თქმით, ხელისუფლება პირიქით იქცევა: ბენზინის ფასი იზრდება და შემცირებაზე უარს ამბობენ, ქვეყანა იცლება, საცობებისა და კორპუსების რაოდენობა კი მატულობს.