დღეს, 25 ივლისს, ხორავას ქუჩაზე მოკლული დათუნა სარალიძე 18 წლის გახდებოდა. ჟურნალისტი თამო კეშელევა ამასთან დაკავშირებით სოციალურ ქსელში წერს:
„18 წლის გახდა! ერთხელ, 16 წლის რომ იყო, მიწაზე დაწვა, წარმოიდგინა, რომ სხეული სისხლისგან ეწრიტება და წამით, მართლა შეეკრა სუნთქვა… უყურებდა ცას და ისე ცოტა იყო მანძილი ცასა და მიწას შორის, აგერ, აგერ, გასრესდა ცა და მიწა, მოიქცევდა შუაში და თვალები სწრაფად დახუჭა… ერთხელ, 16 წლის რომ იყო, გოგო შეუყვარდა… ჯიუტად ცდილობდა, გაეღიმებინა, ჯიუტად ცდილობდა, გაეცინებია და თუ გოგო გაიღიმებდა და გაუცინებდა, იმ დღეს ცეკვავდა მხართან მოქცეული ხელებით და გაშლილი გულით… ერთხელ, 16 წლის რომ იყო, აწყენინეს, ძალიან აწყენინეს – ცილი დასწამეს, ტყუილუბრალოდ აგინეს, ტყუილუბრალოდ ლანძღეს უცხო ადამიანებმა … უნდოდა თავი ემართლებინა, მაგრამ არ შეეძლო… არ შეეძლო, რადგან, მანამდე ცოტა ხნით ადრე, ერთხელ, 16 წლის რომ იყო, ის მოკლეს მოკლეს და მან ბოლო წამამდე არ იცოდა, რომ მოკლეს, იწვა მოწაზე, სისხლი დასდიოდა დაჩეხილი სხეულიდან, გრძნობდა არტერიის ფეთქვას, სისხლის ყოველ გამოსხმაზე, გრძნობდა, როგორ უნელდებოდა გულის ცემა და უჭირდა სუნთქვა …
რცხვენოდა, რცხვენოდა, რომ შარვალს უხსნიდნენ სისხლის შესაჩერებლად… რცხვენოდა, რადგან, არ იცოდა, ჯერ არ იცოდა რომ მოკლეს და იმაზე ფიქრობდა, მერე როგორ შეხვდებოდა ადამიანებს, რომლებმაც იმ დღეს მისი ტრუსი დაინახეს… არ ფიქრობდა, რომ მოკლეს, ვერ წარმოიდგენდა, რომ გაიმეტენდნენ, არ დაუშვია, რომ სასიკვდილოდ მიატოვებდნენ და გაიქცეოდნენ…
ბოლოს ცას ახედა და ისე ახლოს იყო ცა მიწასთან, წამით დახუჭა თვალი, წამით დახუჭა, რომ ისევ გაეხილა… დღეს 18 წლის გახდა! სრულწლოვნობის დამამტკიცებელ საბუთს აიღებდა დღეს!
მაგრამ, მის სახელზე, მხოლოდ დაბადების და გარდაცვალების მოწმობაა…
და სამყარო ილექავს, მის წინააღმდეგ ნათქვამ ყველა სიტყვას, სამყარო ილექავს, მისი და მისი ოჯახის შეურაცხმყოფელ სიტყვებს და დააბრუნებს, აუცილებლად დააბრუნებს ადრესატებამდე…
ყველას კარს მიუკაკუნებს სამყარო, არც იმათი ფანჯრები დაავიწყდება, რომლებიც სდუმდნენ!
ყველას სულში დატოვებს ლექს, ნარეცხს, შლამს სამყარო – ვინც მოკლული ბიჭის სიმართლის გადაწერა სცადა!
და სამყარო ინახავს, მის ღიმილს, ცეკვისას მხრებთან მიტანილ ხელებს და გაშლილ გულს…
და იმ გოგოსაც ხშირად მიუტანს მოგონებებს, როგორ ჯიუტად ცდილობდა გაეღიმებინა და გაეცინებინა… და სამყარო ყველა მის ღიმილს, ყველა მის ბედნიერ დღეს, ყველა მის სიხარულს, რომელიც უნდა ჰქონოდა და არ დააცადეს, მის დას მიუტანს საჩუქრად! ოღონდ, მანამდე, ურემი გადაბრუნდება და გზა გამოჩნდება! რაკი, სხვაგვარად არ მოხერხდა გზის პოვნა, გადააბრუნებს სამყარო ურემს! გეშინოდეს, ურემო! დღეს 18 წლის გახდა…“
Discussion about this post