ძლიერი სტიქია სვანეთში – განადგურებული ავტომობილები, საავტომობილო ხიდი და ხევში ჩარჩენილი ტურისტები (VIDEO)

დაბა მესტიაში რამდენიმედღიანი გადაუღებელი წვიმის შედეგად, ლეხზირის ხეობაში, დიდი რაოდენობით ნატანი მასალის ჩადინების შედეგად მდინარე მესტიაჭალა ადიდდა და კალაპოტიდან გადავიდა.

განადგურდა რამდენიმე ავტომანქანა, საავტომობილო ხიდი და სხვა ინფრასტრუქტურა. დაზიანდა წყლის მიმღები ცენტრალური მაგისტრალის ორი მილი, რომელიც მესტიას წყლით ამარაგებ მდინარის ადიდების გამო დაიტბორა „მესტიაჭალა ჰესი 1“-ის ტერიტორია. ჰესის მფლობელი კომპანიის „სვანეთი ჰიდროს“ ინფორმაციით, უშუალოდ სადგური მნიშვნელოვნად არ დაზიანებულა და ნატანის გაწმენდის შემდეგ ფუნქციონირებას ჩვეულებრივ განაგრძობს.

სვანეთინიუსის ინფორმაციით, დაბა მესტიაში მაცხოვრებლების თითქმის ნახევარს წყალი ამ დრომდე არ მიეწოდება.

როგორც მესტიის “წყალმომარაგების განყოფილების” უფროსის მოადგილე, გიორგი ნაკანი განმარტავს, დაზიანება სავარაუდოდ ჭალადის მიმდებარე ტერიტორიაზეა, რადგან ჩამარხული წყლის მილები მდინარემ სავარაუდოდ სწორედ აქ მოთხარა და წაიღო. მისივე თქმით დაზიანების ზუსტი მდებარეობა არ იციან, ამიტომ ამ ეტაპზე ვერ ზუსტდება როდის აღდგება წყლის მიწოდება. გიორგი ნაკანის თქმით დილიდან სტიქიის ზონაში აქტურ რეჟიმში მუშაობენ წყლის მომარაგების კომპანიის თანამშრომლები.

მაშველებმა ადიდებული მდინარის, მესტიაჭალის ნაპირიდან უსაფრთხო ადგილზე გადაიყვანეს 100-მდე ქართველი და უცხოელი ტურისტი. ისინი სტიქიის გამო ვერ ახერხებდნენ მდინარის მეორე ნაპირზე დაბრუნებას. მათ შემოვლითი,თითქმის გაუკვალავი გზით დაახლოებით 5 კილომეტრის გავლა მოუწიათ წვიმაში, რომ საავტომობილო გზამდე მოეღწიათ, რადგან წაღებული ხიდების გამო მათი გადმოყვანა ადგილიდან,მდინარის მეორე ნაპირზე ვერ მოხერხდა.