ლავასოღლი თურქეთის ციხეში პირის და თვალების ამოკერვით იმუქრება – რა მოთხოვნა აქვს ე.წ. კანონიერი ქურდს?

ე.წ. კანონიერი ქურდი მინდია გორაძე, იგივე ლავასოღლი, რომელიც ინტერპოლის წითელი ცირკულარით იძებნებოდა, თურქეთში 2018 წლის ოქტომბერში დააკავეს. 2018 წლის ზაფხულში ბათუმის საქალაქო სასამართლომ ის 2231 მუხლის მეორე ნაწილით („კანონიერი ქურდობა“) და 2232 მუხლით („ქურდულ შეკრებაში“ მონაწილეობა) დამნაშავედ ცნო და დაუსწრებლად 12-წლიანი პატიმრობა მიუსაჯა. ამჟამად, „ლავასოღლი“, რომელმაც თურქეთის ციხეში პროტესტის უკიდურეს ფორმას – მშრალ შიმშილობას მიმართა, აპირებს პირი და თვალები ამოიკეროს. ადვოკატის მტკიცებით, მინდია გორაძე პოლიტიკური პატიმარია და დაცვის მხარე მისი სიმართლის დასამტკიცებლად, სტრასბურგამდე მივა.
„პროგრესნიუსს“ ადვოკატი ლექსო კობაიძე ესაუბრა:

_ ჩემი დაცვის ქვეშ მყოფი მინდია ლავასოღლი სამი დღეა მშრალ შიმშილობაზე იმყოფება და აპირებს პირი და თვალები ამოკეროს, რომ ბოლოს და ბოლოს, საქართველომ მისი ექსტრადაცია მოახდინოს ან თავი დაანებოს. ეს ადამიანი სრულიად გაურკვეველ მდგომარეობაშია- მეექვსე თვეა, უკანონოდ იმყოფება თურქეთის ე.წ. სადეპორტაციო ციხეში და ეს დრო სასჯელში არ ეთვლება. ფაქტობრივად, ტყუილად ზის. თუ საქართველოს მისი დეპორტაცია უნდა, ამდენი ხანი რატომ არ მიჰყავს და თუ გაშვება უნდა, რატომ არ უშვებს? ამის გარდა, ძალიან დიდ პროტესტს იწვევს ის ფაქტი, რომ ქუთაისის საქალაქო სასამართლოს შემდეგ მინდია ლავასოღლის კანონიერ ქურდობაზე სასჯელი რამდენიმე დღის წინ ბათუმის საქალაქო სასამართლომაც გამოუტანა.
_ რა ხდება, როცა ორი სხვადასხვა სასამართლო ერთ ადამიანს, ერთი და იგივე მუხლით ასამართლებს?
_ სასჯელის ნაწილში არაფერი იცვლება – ქუთაისის სასამართლომ 12 წლით თავისუფლების აღკვეთა მიუსაჯა და ბათუმის სასამართლომ 10 წლით. 12 წელი შთანთქავს 10 წელს, მაგრამ სამართლებრივად, ეს არის წარმოუდგენელი უკანონობა და ნონსენსი. მარტივად რომ ავხსნა, ერთხელ მოკლულ ადამიანს რომ მეორედ მოკლავ, იმას ჰგავს. ეს ადამიანი პოლიტიკურად გაასამართლეს და პოლიტიკური პატიმარია.
_ ამას რით ასაბუთებთ, ე.წ. კანონიერი ქურდის საქმესთან პოლიტიკა რა შუაშია?
_ მინდია ლავასოღლის 12 წელი ისე მიუსაჯეს, რომ მის მიმართ არცერთი პირდაპირი მტკიცებულება არ არსებობდა. „კანონიერი ქურდობის“ ბრალდებას უნდა ახლდეს შემადგენლობა, რომ იყო გამოძალვა, რომ საქმე გაარჩია, რომ არიან დაზარალებულები და ა.შ. ასეთი არაფერი ყოფილა. სასამართლოზე პოტენციური დაზარალებულები მოვიდნენ და განაცხადეს, ჩვენ ამ კაცს არ დავუზარალებივართო, მაგრამ სასამართლომ მაინც გაამტყუნა. პოლიტიკა იმ შუაშია, რომ როდესაც მინდია ლავასოღლი დააკავეს, პროკურატურამ 9 თვიანი ვადა გაუშვა, ქვეყნის დატოვების საშუალება მისცა და 12 წელი დაუსწრებლად მიუსაჯა. პროკურატურა როგორც წესი, 9 თვიანი ვადას არ უშვებს, თან პოლიტიკური ნება რომ არ ყოფილიყო, საზღვარგარეთ არავინ გაუშვებდა. ერთი სიტყვით, გაუშვეს, მოიშორეს და შემდეგ სამართლებრივი ჩარჩოდან გასვლით გაასამართლეს. ეს ერთ-ერთი შემადგენელი ნაწილია სახელმწიფო პოლიტიკის, რომელიც სახელმწიფოს ამ ადამიანის მიმართ გააჩნია. ბათუმის საქალაქო სასამართლოზე ბრალდებამ მხოლოდ სატელეფონო ჩანაწერები წარმოადგინა, სადაც ერთი ექსპერტის აზრით, ლავასოღლის ხმა ისმოდა, მეორე ექსპერტის აზრით კი არა. აუცილებელი იყო პირდაპირი მტკიცებულება, ვიღაცას უნდა ეთქვა, რომ ნამდვილად ველაპარაკე ლავასოღლისო, რაც არ ყოფილა, მაგრამ სასამართლომ მაინც გაამტყუნა და 10 წელი აბსოლუტურად დაუსაბუთებლად მიუსაჯა. კიდევ ერთი მტკიცებულება, რომ ეს ადამიანი პოლიტიკური დევნილია, მისი ოჯახის წევრებზე განხორციელებული დევნა გახლავთ. ახლახან, მის მეუღლეს ერთ-ერთმა ბანკმა კრედიტის მიცემაზე უარი უთხრა იმ საფუძვლით, რომ შსს-მ ამის გაკეთება აუკრძალა. თუ პოლიტიკური დევნა არა, სხვა რა უნდა ვივარაუდოთ? გულწრფელად ვამბობ, რომ ეს ადამიანი არავის არაფერს უშავებს. ერთი კაცი არ ეყოლება საქართველოში მომჩივანი, რომ ვინმეს რამე წაართვა ან ავნო, მაგრამ ასე ჰყავთ ამოჩემებული აჭარაში და ხდება მისი დევნა. პოლიტიკური დევნის დროს კი სამართალი უძლურია და პოლიტიკური დევნის ინსტრმენტად იქცევა ხოლმე როგორც სასამართლო, ასევე პროკურატურა.
_ პროტესტის მიუხედავად, თქვენი მოთხოვნები თუ არ დაკმაყოფილდა, რა გეგმა გაქვთ?
_ ვაპირებთ სტრასბურგის სასამართლომდე მივიდეთ და სიმართლე დავამტკიცოთ. 6 თვიან ვადასთან მიმართებაში 15 დღე დარჩა. ამ ვადის გასვლის შემდეგ, თუ საქართველომ არ გადმოიყვანა, თურქეთის რესპუბლიკამ ე.წ. მესამე ქვეყანაში ან ნეიტრალურ სასაზღვრო ზონაში უნდა გაუშვას. ვნახოთ, თურქეთი თვითონ გადაწყვეტს რა უნდა გააკეთოს. იმედი მაქვს, რომ ლავასოღლის საქართველოში ექსტრადირება არ მოხდება, თუმცა თვითონ ამისთვისაც მზად არის. მისი პოზიციაა,რომ ჩამოვიდეს და აქედან იბრძოლოს იმ უკანონობისწინააღდეგ, რაც მის წინააღმდეგ მიმდინარეობს. რადგან სახელმწიფო ებრძვის, ის თავის დაცვისთვის მზად არის და ყველაფერს გააკეთებს, რომ თავისი სიმართლე დაამტკიცოს.
_ ერთ-ერთი გავლენიანი „კანონიერი ქურდი“ ტარიელ ონიანი 19 მაისს ციხეს დატოვებს. თქვენი აზრით, მოხდება თუ არა ონიანის საქართველოში ექსტრადაცია?
_ რაც შეეხება ტარიელ ონიანს, მე მისი ადვოკატი არ ვარ და როგორც ყველას, ზოგადი ინფორმაცია მაქვს. ვიცი, რომ ათწლიანი სასჯელი ერთ-ერთ მძიმე ციხეში მოიხადა და როცა უნდა გათავისუფლებულიყო, ზუსტად იმ დროს, რუსეთის ფედერაციაში მიიღეს კანონი, რომლის თანახმად, კრიმინალური სამყაროს წინააღმდეგ ბრძოლა გამკაცრდა. მოგეხსენებათ, რუსეთი ქურდული სამყაროს ყველაზე დიდი დასაყრდენია, რადგან თავის დროზე, იქ აღმოცენდა და საბჭოთა საზოგადოების ფსიქოტიპზეა მორგებული. ახალი კანონით კი თუ პირი კანონიერი ქურდი ან ავტორიტეტია, 15 ან 20 წლამდე პატიმრობით დაისჯება. ეს ნიშნავს, რომ რუსეთის ხელისუფლებამ კანონიერ ქურდებზე ნადირობა დაიწყო. ქურდულ სამყაროს ძალაუფლება შეუმცირეს, რადგან რუსეთში ძალიან დიდი გავლენები ჰქონდა. ვნახოთ, როგორ გადაწყვეტს ონიანის ექსტრადაციის საკითხს რუსეთის ფედერაცია, მაგრამ ერთი შემიძლია გითხრათ, რომ მას თურქეთში უკვე ელიან და არის მოლოდინი, რომ სწორედ თურქეთში გააგრძელებს ცხოვრებას „პროგრესნიუსი“