ზუგდიდის მეექვსე სკოლის გამორჩეული დირექტორი, ია კერზაია რომ წინასაარჩევნო ზეწოლის მსხვერპლი გახდა, ამაზე საუბრობს არა მხოლოდ პოლიტიკური ოპოზიცია – განხადებები გაკეთდა საერთაშორისო და ადგილობრივი არასამთავრობოების მხრიდან.
“ქართული ოცნებისა” და პირადად განათლების მინისტრის, მიხეილ ბატიაშვილის ორმაგ სტანდარტს ამტკიცებს ის უმძიმესი ვითარება, რაც “ნიუპოსტს” ზუგდიდის მეთერთმეტე სკოლაში დახვდა. სანიტარულ–ჰიგიენური პირობების დარღვევა საპირფარეშოებში, გაუმართავი ელექტრო სისტემა, დამტვრეული ინვენტარი და საფრთხის შემცველი კიბის მოაჯირები თუ იატაკი.
სკოლის დირექტორი, მანუჩარ ხარებავა საგანმანათლებლო დაწესებულებაში არსებულ მძიმე ვითარებას აღიარებს და ამბობს, რომ ამის შესახებ სამინისტრომ მრავალი წელია იცის. ხარებავას თქმით, ბატიაშვილი და მისი ყველა წინამორბედი ინფორმირებულია, რომ სკოლის შენობაში სველი წერტილი არ არის და მოსწავლეები ეზოში მდგარ ცალკე ნაგებობაში განთავსებული ტუალეტებით სარგებლობენ, სადაც გაუსაძლისი სუნი და ანტისანიტარია შეუიარაღებელი თვალითაც ადვილად შესამჩნევია.
აშკარაა რომ ბატონ ხარბედიას გაუმართლა ან უარეს შემთხვევაში ხელისუფლება წყალობს, განსხვავებით ია კერზაიასგან, რომელიც საპრეზიდენტო არჩევნების მეორე ტურის წინ, მის მიმართ განხორციელებულ პოლიტიკურ ზეწოლაზე ღიად საუბრობდა და ამბობდა, რომ მას მმართველი გუნდის მიერ მხარდაჭერილი საპრეზიდენტო კანდიდატის სალომე ზურაბიშვილის სასარგებლოდ აგიტაციის გაწევას სთხოვდნენ.
“თუ ინფრასტრუქტურულ მდგომარეობას გულისხმობთ, ვიზუალურად, სკოლას გარედან არაუშავს, მაგრამ შიგნით გარკვეული პრობლემები გაქვს, რომლის მოგვარებითაც რამდენიმე წელია, საკუთარი სახსრებით, დაკავებულები ვართ. თუმცა სკოლის მოცულობიდან გამომდინარე, ამას სკოლის სახსრები ვერ გაწვდება”- უთხრა “ნიუპოსტს” მანუჩარ ხარებავამ.
სკოლის დირექტორი პირობას დებს, რომ 2020 წლის ზაფხულისთვის საპირფარეშოს პრობლემა მოიხსნება. მისი თქმით, განათლების სამინისტროს ინსპექტირებს სამსახურმა სკოლის სრული აღწერა მოახდინეს, თუმცა ფაქტია, რომ ბატიაშვილის უწყებამ თვალი დახუჭა იმ მძიმე ვითარებაზე, რაც საპირფარეშოში “ნიუპოსტმა” გადაიღო:
კერძოდ, მოსწავლეებისთვის ეზოში განთავსებულ ტუალეტებში არსებული სიბინძურე და ანტისანიტარია, დაულაგებელი ტუალეტები, მძაფრი სუნი, დაბინძურებული ხელსაბანი ნიჟარა და სხვა…
“1976 წელს არის ექსპლუატაციაში შესული ეს სკოლა, სველი წერტილი მხოლოდ ნახაზზე დარჩა და შიგნით არასდროს ყოფილა. ახლა გამოვნახეთ ადგილი და შეიძლება ითქვას, რომ ზაფხულის პერიოდში ახალი საპირფარეშო აშენდება…გვიჭირს ელექტროგამანაწილებელი სისტემა, გვიჭირს კიბის უჯრედები, დერეფანი, კარი, იატაკი…”- აღნიშნა მანუჩარ ხარებავამ.
11-ე სკოლის დირექტორს მისი გარდაცვლილი კოლეგის ია კერზაიას საქმის პოლიტიკურ სარჩულზე საუბარი არ სურს, მისი თქმით, კერზაიას კარგად იცნობდა, თუმცა მას პოლიტიკურ ზეწოლაზე არ უსაუბრია, რაც შეეხება მეექვსე სკოლის დირექტორის ღია განცხადებას, ხარებავა ამბობს, რომ “კომენტარის გაკეთება მისი კომპეტენცია არ არის”.
“ვერაფერს ვიტყვი… რა სიტუაციებიც არის ძალიან კარგად მესმის, თვალ-ყურს ვადევნებ და მაინტერესებს კიდევაც, რადგან ქალბატონ იასთან ძალიან კარგი ურთიერთობა მქონდა და ყველამ გულთან მოვიტანეთ, თუმცაღა რა პროცესებიც მოჰყვა, რაღაც პოლიტიკური რაღაცები, ეს ჩვენს იმას სცილდება… ეს არ არის ჩვენი შესაფასებელი. შიდა აუდიტი შევიდა, დაემთხვა რაღაც მოვლენები, ეს უკვე ჩვენი შესაფასებელი არ არის”- აღნიშნა მანუჩარ ხარებავამ.
“ნიუპოსტი” დაინტერესდა არის თუ არა ხარებავა პრივილეგირებული, რადგან მეექვსე სკოლასთან მიმართებით ინსპექტირების სამსახურის დასკვნაში არსებული ხარვეზების დიდი ნაწილი მეთერთმეტე სკოლაშიც აღმოვაჩინეთ, რაზეც სკოლის დირექტორმა თქვა, რომ “შემოვიდნენ, ყველა თავის ქმედებაზე აგებს პასუხს”.
ზუგდიდის მე-6 საჯარო სკოლის დირექტორი ია კერზაია გასული წლის 9 დეკემბერს, ინსულტის შედეგად გარდაიცვალა. მანამდე, ის საპრეზიდენტო არჩევნების მეორე ტურის წინ, მის მიმართ განხორციელებულ პოლიტიკურ ზეწოლაზე საუბრობდა. კერზაია ამბობდა, რომ მას მმართველი გუნდის მიერ მხარდაჭერილი საპრეზიდენტო კანდიდატის სალომე ზურაბიშვილის სასარგებლოდ აგიტაციის გაწევას სთხოვდნენ.
„იყო ჩემთანაც ადამიანი, რომელმაც მითხრა, შენ გედავებიან იმას, რომ არა ხარ ოცნების აქტივისტი და ვინმე დაიხმარე, ზემდგომი ისეთი, რომელიც უნდა დაარწმუნო, რომ შენ გასწევ ამაზე აგიტაციას და იმუშავებ ოცნების ხმის მოსაგროვებლად, ზურაბიშვილის [სასარგებლოდ]“, – აცხადებდა კერზაია ტელეკომპანია „რუსთავი 2“-თან საუბარში გარდაცვალებამდე.
გარდაცვლილის შვილი, ბაჩანა შენგელია აღნიშნავს, რომ ია კერზაიას მხრიდან აგიტაციაში ჩართვის უარის შემდეგ, განათლების, მეცნიერების, კულტურისა და სპორტის სამინისტრომ ანონიმურ წერილზე რეაგირების მიზნით, ზუგდიდის მე-6 საჯარო სკოლის შესამოწმებლად ინსპექტირების სამსახური გაუშვა, სამსახურის მიერ დაწერილი დასკვნის შემდგ კი, სკოლის სამეურვეო საბჭოს დირექტორის გათავისუფლების რეკომენდაციით მიმართა.
მისი თქმით, ია კერზაიამ მასზე განხორციელებული ზეწოლის წნეხს ვერ გაუძლო, რამაც მისი ჯანმრთელობის მდგომარეობა გაუარესება გამოიწვია. 2 დეკემბერს ის ინსულტის დიაგნოზით ზუგდიდის რეფერალურ საავადმყოფოში გადაიყვანეს. ერთკვირიანი კომატოზური მდგომარეობის შემდეგ, ის 9 დეკემბერს საავადმყოფოში გარდაიცვალა.
ბაჩანა შებგელია ამბობს, რომ ხელისუფლებას რეზონანსული საქმის გამოძიების პოლიტიკური ნება არ აქვს, რადგან ახალგაზრდა ქალი სწორედ ქართული ოცნების მაღალჩინოსნების ზეწოლას შეეწირა.
Discussion about this post